ملخص وتحليل مباراة سيمبا والوداد 2-0 هل اقترب الخروج ؟ 19 ديسمبر 2023

 

خسر #الوداد خارج ملعبه امام #سيمبا بهدفين نظيفين في اطار مباريات الجولة الرابعة لدور المجموعات لمسابقة #دوري_ابطال_افريقيا

الوداد بيزداد موقفه صعوبة وبيقترب اكتر من الخروج المبكر من دور المجموعات بعد ما توقف رصيده عند 3 نقاط فقط في المركز الاخير، ومتبقي له مباراتين ضد جوانينج البوتسواني خارج الارض ومباراة اسيك في المغرب

لا بديل للوداد عن الفوز في المباراتين مع خسارة سيمبا صاحب المركز التاني امام اسيك المباراة القادمة في كوت ديفوار

اللي عمل المشكلة دي كلها هي الخسارة الغريبة والمفاجأة جدا في اول مباراة ضد جوانينج الضعيف جدا واللي مينفعش انه ياخد اي نقاط من الوداد سواء في ملعبه او خارج ملعبه

مباراة اليوم هي الاولى للمدرب المخضرم العائد لتدريب الوداد فوزي البنزرتي، بعد ما قررت إدارة الوداد التفريط في المدرب الوطني عادل رمزي اللي اعتقد انه كان قرار متسرع الى حد كبير، خصوصا ان الفريق كان كسب ماتش سيمبا الاخير في اخر دقيقة وكان ممكن الفوز ده يرجع الثقة للمدرب مرة تانية ويقدر يصحح الاوضاع في الجولات القادمة، لكن قرار التغيير والهزيمة النهاردة هتفتح باب انتقادات كبيرة للإدارة حوالين جدوى تغيير المدير الفني

نرجع للمباراة واللي بدأها الوداد بضغط كبير جدا في اول 20 دقيقة بحثا عن هدف التقدم ومحاولة الفوز خارج الارض لتجنب اي سيناريوهات مفاجأة في الجولات القادمة، وبالفعل ضيع الوداد 3 فرص محققة في اول 20 دقيقة تفنن في اضاعتها المهاجم سامبو ولهتيمي وبوهرة وتألق الحارس المغربي لسيمبا بقوة في التصدي للفرص دي

بعد كده وتحديدا من الدقيقة 30 بدأ سيمبا بقيادة مدربه المخضرم عبد الحق بن شيخه انه يدخل اجواء المباراة ونجح في انه يسجل هدفين متتاليين وسط توهان من دفاع ووسط ملعب الوداد، والهدفين اتسجلوا عن طريق نفس اللاعب ايسومبا اونانا في الدقيقتين 36 و 38 على التوالي

الهدفين جاءوا بمثابة الصدمة للوداد اللي كان مسيطر وقريب جدا من افتتاح النتيجة، بعد الهدفين اصاب الوداد توتر شديد جدا وفشل في صناعة اي فرصة لغاية نهاية الشوط الاول رغم احتساب الحكم 7 دقائق وقت بدل ضائع

في الشوط التاني وبنفس الوتيرة اللي انتهى عليها الشوط الاول سيمبا كان هو اللي عنده رغبة في تسجيل الهدف التالت وضيع فرصتين محققتين في اول 10 دقايق من الشوط، بعدها نشط الوداد بشكل خبير خصوصا بعد تغييرات فوزي البنزرتي بنزول محمد اوناجم وزهير المترجي جناحين يمين وشمال، بدأ الوداد يسيطر بشكل كبير على اللعب لكن للأسف مكانش قادر انه يخلق فرص كتير تسمح له بتسجيل ولو حتى هدف فما بالك انه يتعادل او يكسب

اخطر فرصة كانت في نهايات الشوط التاني تحديدا اخر 10 دقايق كرة عرضية من اوناجم بيخرجها الحارس بشكل خاطيء توصل للمهاجم سامبو جوه ال 6 ياردات يحطها فوق العارضة بغرابة شديدة فرصة لا تضيع للوداد

في المقابل رغم سيطرة الوداد لكن هجمات سيمبا المرتدة كانت بتشكل خطورة كبيرة جدا على مرمى يوسف المطيع لإن هجوم سيمبا كله سرعات بشكل مرعب مع بطء لاعيبة الوداد في الدفاع وعدم عودة الظهيرين يحيى عطية الله وايوب العملود للمساندة الدفاعية

انتهت المباراة بفوز سيمبا المستحق تماما على الوداد بهدفين نظيفين عشان تتصعب جدا مهمة الوداد اللي مش بس محتاج يكسب الماتشين المتبقيين ليه، لأ كمان محتاج انه سيمبا يخسر المباراة القادمة خارج ملعبه ضد اسيك في كوت ديفوار، عشان يوصل الوداد ل 9 نقط ويكون اقصى رصيد يوصل له سيمبا هو 8 نقاط فقط

لتحميل ملخص المباراة اضغط هنا