ملخص وتحليل مباراة الاهلي وفلومينينسي 0-2 الاهلي يفرط في حلم النهائي 18 ديسمبر 2023

فرط #الاهلي في حلم الوصول لنهائي #كاس_العالم_للاندية_2023 بعد خسارته امام #فلومينينسي البرازيلي بهدفين نظيفين في مباراة الدور قبل النهائي

ضيع الاهلي فرصته للتأهل للمباراة النهائية من خلال اللي حصل في الشوط الاول وتفريط الاهلي في افضلية واضحة على مستوى الفرص، الاهلي تقريبا ضيع 4 فرص محققة في الشوط ده مقابل فرصتين فقط لفلومينينسي كانوا في القايم

الشوط التاني اداء فلومينينسي كان افضل كتير من الشوط الاول، والاهلي تأثر بالعامل البدني بعد ما لعب ماتش كبير قصاد اتحاد جدة من يومين بس، عشان كده مقدرش يأدي الشوط التاني بنفس القوة اللي كان عليها في الشوط الاول

بالنتيجة دي هيلعب الاهلي على المركز التالت والرابع امام الخاسر من مانشستر سيتي واوراوا الياباني، هتقام مباراة التالت والرابع يوم الجمعة 22 ديسمبر الساعة الرابعة والنصف عصرا بتوقيت القاهرة

لو جينا لتحليل المباراة وهنبدأ الشوط الاول الاهلي مكانش هايب الموقف وسعى للهجوم من الدقيقة الاولى استغلالا للحماس الجماهيري، استغل الاهلي اندفاع فريق فلومينينسي المبالغ فيه في الهجوم ب 7 لاعيبة تقريبا ومكانش فيه في الدفاع غير 3 لاعيبة بس وهو ده اللي كان بيدي الاهلي فرص كبيرة انه يعمل هجمات مرتدة بزيادة عددية مستمرة

احيانا كنا بنشوف انفراد 2 على 3 او 4 على 5 مثلا او احيانا كمان 3 على 5، لكن معدل استغلال الفرص عند الاهلي كان صفر النهاردة عكس مباراة اتحاد جدة تماما اللي كان الفريق موفق تماما في معظم الفرص اللي جاتله

فلومينينسي فريق مميز جدا في التحضير من ورا وعمل كثافة عددية كبيرة في نص ملعب الخصم وفي مكان واحد، يعني بتلاقي في كتير من الاوقات 7 لاعيبة موجودين ناحية اليمين اللي هي الجبهة اللي عايزين يهاجموا منها، ده احيانا بيصعب على الاهلي فرصة قطع الكورة نتيجة كثافة لاعيبة فلومينينسي في منطقة واحدة، لكن في حالة قطع الكورة بتكون فرصة الهجمة المرتدة كبيرة جدا للأهلي لكن كان فيه تسرع كبير جدا في التلت الاخير خصوصا كهربا وبيرسي تاو اللي ضيعوا فرص كتيرة جدا على مدار المباراة

فلومينينسي الشوط الاول ضيع فرصتين محققتين والاتنين عن طريق اللاعب الاسمر رقم 21 المميز جدا، الفرصة الاولى كانت من عرضية كينو لعبها المهاجم على الطاير لكنها اصطدمت في القايم اليمين

الفرصة التانية كانت من ضربة ركنية اتلعبت على حدود ال 18 سددها نفس اللاعب في نفس القايم

الاهلي كانت ليه 4 الى 5 فرص محققة ابرزها الكورنر اللي لعبه عبد المنعم براسه على الزاوية البعيدة لكن الباك اليمين بتغطية ممتازة قطع الكورة قبل كهربا عشان تضيع فرصة كبيرة جدا

الفرصة التانية اللي متضيعش كانت لكهربا اللي استغل كورة حسين الشحات اللي اتسددت وخبطت في دفاع فلومينينسي ووصلت لكهربا حطها بدماغها لكن في نص الجول مش في زاوية عشان كده الحارس تصدى ليها

الشوط التاني وضح جدا التأثر بالجانب البدني وضيق الوقت بين ماتش النهاردة وماتش اتحاد جدة، فلومينينسي بدأ يسيطر اكتر وبدأ التعب يظهر على لاعيبة الاهلي خصوصا المدافعين بالذات عبد المنعم اخطأ كذا مرة في التمرير في اماكن خطيرة جدا وكان بيتمكن فلومينيسي من عمل هجمات خطيرة

الجانب البدني ده وضح جدا في ضربة الجزاء الساذجة اللي عملها بيرسي تاو على مارسيلو، طريقة الدخول على مارسيلو نفسها تحسها نتيجة ارهاق بيرسي تاو الشديد من المجهود اللي بذله على مدار الشوطين

كمان خروج فريق فلومينينسي بالكورة كان اسهل بكتير في الشوط التاني لإن لاعيبة الاهلي مكانش عندها الطاقة الكافية انها تطارد الكورة خصوصا مع المهارة العالية في التسليم والتسلم عند لاعيبة فلومينينسي والخروج بالكورة بإسلوب شبيه جدا بإسلوب مانشستر سيتي

ونتيجة لهجمة منظمة من فلومينينسي بطريقتهم المعتادة قدروا انهم يسجلوا الهدف التاني قبل دقيقة واحدة من النهاية علشان تنتهي المباراة اكلينيكيا بالهدف ده

لتحميل ملخص المباراة اضغط هنا